25/09/2017 – 10:14
მთავარი უცხოეთის ამბები

გენერალური ასამბლეის ყოველწლიური სესია ჩვენი რეგიონის კუთხითაც აღმოჩნდა საინტერესო. აზერბაიჯანის და სომხეთის პირველმა პირებმა თავიანთ გამოსვლებში მწარე კომენტარები არ დაიშურეს ერთმანეთის მიმართ. პრეზიდენტმა სარქისიანმა დაადანაშაულა აზერბაიჯანი სომეხი მოსახლეობის მასობრივ დეპორტაციასა და ეთნიკურ წმენდაში. ხოლო ილჰამ ალიევის მიერ გასული წლის აპრილში აზერბაიჯანელი სამხედრო დამნაშავის დაჯილდოება შეაფასა, როგორც ,,შუასაუკუნეების დროინდელი ჩამორჩენილობის სიმბოლიზირება’’.

საპასუხოდ აზერბაიჯანის პრეზიდენტმა სომხეთი მოიხსენია, როგორც ,,კორუმპირებული, არშემდგარი ქვეყანა, რომელიც დესპოტური, შუასაუკუნეობრივი რეჟიმის მიერ იმართება’’. ორივე პრეზიდენტმა თავიანთ გამოსვლაში აქცენტი გააკეთეს ყარაბაღის კონფლიქტზე, მის ისტორიასა და ბოლო წლებში განვითარებულ მოვლენებზე. მათ მიერ გამოყენებული ლექსიკითა და დაფიქსირებული პოზიციით თუ ვიმსჯელებთ, აღნიშნული კონფლიქტის მშვიდობიანი მოგვარება ახლო მომავალში ძნელად სავარაუდოა.

1 ოქტომბრის რეფერენდუმის მოახლოებასთან ერთად კატალონიაში სიტუაცია დღითი დღე იძაბება. ესპანეთის პოლიციამ დააკავა კატალონიის ეკონომიკის მინისტრი ხოსე მარია ხოვე და სხვა მთელი რიგი მაღალი რანგის ჩინოვნიკები. დაკავებებს თან ახლდა კატალონიის ეკონომიკის, შინაგან საქმეთა, საგარეო ურთიერთობების, საგადასახადო და ტელეკომუნიკაციის სამთავრობო უწყებების ჩხრეკა და დოკუმენტაციის ამოღება, რომლებიც დაკავშირებულია რეგიონის დამოუკიდებლობის საკითხთან დაკავშირებულ რეფერენდუმთან.

დაკავებებს მკვეთრად უარყოფითი რეაქციია მოჰყვა კატალონიის მაცხოვრებელთა მხრიდან. რეფერენდუმის მომხრეები მართავენ ფართომასშტაბიან გამოსვლებს ქალაქ ბარსელონაში და მოითხოვენ დაკავებული ჩინოვნიკების განთავისუფლებასა და დაგეგმილი რეფერენდუმის დანიშნულ დღეს ჩატარებას. მიუხედავად პროტესტის მზარდი ტალღისა, ესპანეთის მთავრობა პოზიციას არ იცვლის. ოფიციალურ მადრიდს მიაჩნია, რომ რეფერენდუმი ეწინააღმდეგება ესპანეთის კანონმდებლობას და გამომდინარე აქედან, ყველანაირად ხელს შეუშლის აღნიშნული ხმის მიცემის პროცესის ჩატარებას.

რუსეთის საგარეო საქმეთა მინისტრმა, სერგეი ლავროვმა, ჟურნალისტებთან საუბრისას პოზიტიურად შეაფასა აშშ-ის პრეზიდენტის დონალდ ტრამპის გამოსვლა გაეროს გენერალური ასამბლეის სხდომაზე და გამოთქვა იმედი, რომ მალე აშშ-სა და რუსეთს შორის ურთიერთობები დასტაბილურდება. ,,მივესალმები მსგავსი ტიპის განცხადებებს. ეს არის ის, რის გაგონებასაც აშშ-ის ლიდერებისგან ძალიან დიდი ხანია ველით’’. ლავროვის მოწონება ტრამპის მიმართვის იმ ნაწილს ეხებოდა, სადაც მან განაცხადა, რომ აშშ-მა არ უნდა მოახვიოს თავისი ცხოვრების სტილი სხვა ქვეყნებს. ,,ძლიერმა, სუვერენულმა ერებმა განსხვავებული კულტურისა და ფასეულობების მქონე ქვეყნებთან უნდა ითანამშრომლონ და იმუშაონ ურთიერთპატივისცემის პრინციპების საფუძველზე’’ – განაცხადა აშშ-ის პრეზიდენტმა თავის გამოსვლაში.

ლავროვმა აღიარა, რომ აშშ-ს და რუსეთის ურთიერთობა ამჟამად ,,ძალიან დაბალ და რთულ დონეზეა’’, მაგრამ ამ ყველაფერში მან ობამას ადმინისტრაცია დაადანაშაულა. მას მიაჩნია, რომ ბარაკ ობამას მიერ რუსეთისთვის სანქციების დაწესებამ და 35 რუსი დიპლომატის ქვეყნიდან გაძევებამ განაპირობა სწორედ ის დაძაბული ურთიერთობა, რაც დღეს ამ ორ ქვეყანას შორის არსებობს. ლავროვმა გამოთქვა სურვილი, რომ მოხდეს ვლადიმერ პუტინისა და დონალდ ტრამპის პირისპირ შეხვედრა ნოემბერში დაგეგმილ აზია – წყნარი ოკეანის სამიტზე, რათა ორმა ქვეყნის ლიდერმა მოლაპარაკებების უმაღლეს დონეზე მიმოიხილონ მათ ქვეყნებს შორის არსებული პრობლემები.

უბედური შემთხვევა მოხდა რუსეთ-ბელარუსის მიმდინარე სამხედრო წვრთნებზე ,,ზაპად 2017’’. სანქტ-პეტერბურგში რუსულმა ვერტმფრენმა პოლიგონის მახლობლად მდებარე დამკვირვებელთა ავტომობილები შეცდომით სამიზნედ ჩათვალა და მათ მიმართ სარაკეტო ცეცხლი გახსნა. მსხვერპლი არ არის, თუმცა მძიმედ დაშავდა 2 ადამიანი. ინტერნეტში გავრცელდა ამ შემთხვევის ამსახველი ვიდეომასალაც. რუსეთის თავდაცვის სამინისტრომ დაადასტურა მომხდარი ფაქტი, თუმცა განაცხადა, რომ შემთხვევის შედეგად არავინ დაშავებულა.

დონალდ ტრამპის გაეროს ასამბლეაზე წარმოთქმულ სიტყვას მისი ოპონენტი ჰილარი კლინტონიც გამოეხმაურა და მიმართვას მეტად ,,ბნელი’’ და ,,სახიფათო’’ უწოდა. ,,ეს არ არის ის მესიჯი, რასაც უძლიერესი სახელმწიფოს ლიდერი უნდა უგზავნიდეს დანარჩენ მსოფლიოს. პრეზიდენტი არსებულ კონფლიქტებს დიპლომატიითა და მოთმინებით უნდა მიუდგეს და არა მსგავსი ტიპის აგრესიული განცხადებებით’’. ჰილარის კრიტიკას ტრამპმა საკუთარ ტვიტერზე უპასუხა და განაცხადა, რომ ზუსტად ჰილარი კლინტონის სახელმწიფო მდივანის პოსტზე მუშაობისას შეძლო ჩრდილოეთ კორეამ ბირთვული პროგრამის ასე ეფექტურად განვითარება და მას და ყოფილ პრეზიდენტ ბარაკ ობამას თანაბრად მიუძღვით წვლილი ფხენიანის რეჟიმის მსოფლიოს მწვავე პრობლემად ჩამოყალიბებაში.

ვენესუელას პრეზიდენტი, ნიკოლას მადურო, დონალდ ტრამპს თანამედროვე პოლიტიკის ახალი ჰიტლერს უწოდებს. ამის მიზეზი,  დონალდ ტრამპის პირველი მიმართვა გაეროს გენერალური ასამბლეის სხდომაზე  გახდა. დონალდ ტრამპის გამოსვლა ძირითადად მიმართული იყო ირანის, ჩრდილოეთ კორეისა და ვენესუელის მხრიდან მომდინარე საფრთხეებსა და ამ გამოწვევებზე შესაბამისი პასუხების გაცემაზე. მან, ვენესუელას მთავრობას კორუმპირებული სოციალისტური დიქტატურა უწოდა.

ირანის საგარეო საქმეთა მინისტრი, მოჰამედ ზარიფი, დონალდ ტრამპს აკრიტიკებს. ამის მიზეზი,  დონალდ ტრამპის პირველი მიმართვა გაეროს გენერალური ასამბლეის სხდომაზე  გახდა. დონალდ ტრამპის გამოსვლა ძირითადად მიმართული იყო ირანის, ჩრდილოეთ კორეისა და ვენესუელის მხრიდან მომდინარე საფრთხეებსა და ამ გამოწვევებზე შესაბამისი პასუხების გაცემაზე. მან, ირანის ხელისუფლებას კორუმპირებული დიქტატორული რეჟიმი უწოდა და 2015 წელს დასავლეთსა და ირანს შორის ბირთვულ პროგრამასთან დაკავშირებით დადებული შეთანხმება მონათლა, როგორც ერთ-ერთი ყველაზე ცუდი და სამარცხვინო ინიციატივა, რომელშიც კი ოდესმე აშშ-ს მონაწილეობა მიუღია.

დონალდ ტრამპის განცხადებას , ირანის საგარეო საქმეთა მინისტრი, მოჰამედ ზარიფი კრიტიკული პოზიციით გამოეხმაურა : ,,ტრამპის უგუნური და სიძულვილით სავსე გამოსვლა შუა საუკუნეებს უფრო მიეკუთვნება, ვიდრე თანამედროვე ეპოქას’’.

დონალდ ტრამპის პირველი მიმართვა გაეროს გენერალური ასამბლეის სხდომაზე მსოფლიოს ბევრი სახელმწიფოს ლიდერისა და პოლიტიკოსის კრიტიკის ობიექტი გახდა. შეგახსენებთ, რომ ტრამპის გამოსვლა ძირითადად მიმართული იყო ირანის, ჩრდილოეთ კორეისა და ვენესუელის მხრიდან მომდინარე საფრთხეებსა და ამ გამოწვევებზე შესაბამისი პასუხების გაცემაზე. ირანის ხელისუფლებას მან კორუმპირებული დიქტატორული რეჟიმი უწოდა და 2015 წელს დასავლეთსა და ირანს შორის ბირთვულ პროგრამასთან დაკავშირებით დადებული შეთანხმება მონათლა, როგორც ერთ-ერთი ყველაზე ცუდი და სამარცხვინო ინიციატივა, რომელშიც კი ოდესმე აშშ-ს მონაწილეობა მიუღია. ჩრდილოეთ კორეის ლიდერ კიმ ჩონ ინზე საუბრისას, განაცხადა, რომ ,,ეს კაცი-რაკეტა თვითმკვლელობისკენ მიდის’’ და  თუ მომავალში აშშ-ს დაემუქრება საფრთხე ამ ქვეყნისგან, მაშინ იგი პირწმინდად გაანადგურებს მთელს ჩრდილოეთ კორეას. ტრამპის კრიტიკის კიდევ ერთი ობიექტი ვენესუელა გახდა, რომლის მთავრობასაც კორუმპირებული სოციალისტური დიქტატურა უწოდა.

მექსიკის დედაქალაქ მეხიკოში მომხდარ ძლიერ მიწისძვრას 220-ზე მეტი ადამიანის სიცოცხლე ემსხვერპლა, მათ შორის 20 ბავშვია. სკოლის შენობების ნანგრევებში 30-ზე მეტი მოზარდი მოყვა.

ქალაქის გარკვეულ ნაწილში საცხოვრებელი შენობები და ინფრასტრუქტურა მთლიანად განადგურებულია. მაშველები ნანგრევებში მოყოლილი მოქალაქეების გადარჩენას რამდენიმე საათია უწყვეტ რეჟიმში ცდილობენ. თითქმის 4 მილიონი ადამიანი ელექტროენერგიის გარეშეა დარჩენილი. გარდაცვლილთა რაოდენობა ყოველ საათში ერთხელ იზრდება. სეისმოლოგების ინფორმაციით, მიწისძვრის სიმძლავრე 7,1-ბალს შეადგენს. მიწისძვრის ეპიცენტრი მეხიკოდან 120 კილომეტრის დაშორებით მდებარე სოფელი ატენსინგოა. ბიძგები სხვა ქალაქებშიც იგრძნობოდა.

საქართველოს საელჩო მექსიკაში აცხადებს, რომ დაზარალებულთა შორის საქართველოს მოქალაქეები არ არიან. მექსიკის სხვა რეგიონში ძლიერი მიწისძვრა სამი კვირის წინაც დაფიქსირდა, რასაც 90-მდე ადამიანის სიცოცხლე ემსხვერპლა.

პოპულარულ სერიალ ,,ნარკოს’’ გადამღები ჯგუფის წევრი 37 წლის კარლოს მუნიოზ პორტალი მექსიკაში გარდაცვლილი იპოვნეს. პოლიცია მის ტყვიებით დაცხრილულ მანქანას იდალგოს შტატის საზღვართან წააწყდა.აღსანიშნავია, რომ იდალგოს შტატი მექსიკაში მკვლელობების რიცხვის მხრივ პირველ ადგილზეა. კარლოს პორტალი მექსიკაში ,,ნარკოს’’ მეოთხე სეზონის გადაღებებისათვის შესაფერისი ადგილების ძებნით იყო დაკავებული.

მისი მეგობრების განცხადებით მკვლელობის მიზეზი მხოლოდ ორი შეიძლება ყოფილიყო. გამომდინარე იქიდან, რომ კარლოსი ვიდეოკამერით იღებდა სხვადასხვა ადგილებს, ამიტომ შესაძლოა ადგილობრივმა კრიმინალებმა იგი როგორც გამომძიებლად და ინფორმაციის შემგროვებლად აღიქვეს და ამიტომ გაუსწორდნენ. ანაც სავარაუდოა, რომ სერიალის შინაარსმა მექსიკის ნარკოკარტელებში უკმაყოფილება გამოიწვია და პასუხად მისი ლიკვიდაცია მოახდინეს. გამომდინარე იქიდან, რომ ,,ნარკოს’’ მეოთხე სეზონი მთლიანად მექსიკელი ნარკობარონების გარშემო უნდა განვითარდეს, გამორიცხული არაა, რომ  პორტალი სწორედ მათი მხრიდან ანგარიშსწორებას შეეწირა.