25/11/2017 – 02:20
მთავარი უცხოეთის ამბები

მსოფლიოში ამჟამად არსებული 5 ყველაზე გავლენიანი და მდიდარი ორგანიზებული კრიმინალური დაჯგუფებები:

  1. სოლნცევოს საძმო (რუსული მაფია) – დაარსდა 1980-იანი წლების ბოლოს სერგეი მიხაილოვის იგივე ,,მიხასის’’ მიერ. დამაარსებლებს შორის ერთერთი იყო ქართველი კანონიერი ქურდი ჯემალ ხაჩიძე. დაჯგუფებას სახელი ეწოდა მოსკოვის სოლნცევოს რაიონის მიხედვით. ამჟამად მისი წევრების რაოდენობა 9000 ადამიანს ითვლის და წლიური შემოსავალი 8.5 მილიარდ დოლარს აჭარბებს. შემოსავლის ძირითადი წყაროებია ნარკოტიკებით ვაჭრობა და ტრეფიკინგი. ნარკოტიკებიდან აღსანიშნავია ჰეროინი, რომელიც რუსეთში ავღანეთიდან შედის. არსებული მონაცემებით რუსეთი მოიხმარს მსოფლიოში წარმოებული ჰეროინის 12%. 2010 წელს ვიკილიქსის მიერ გამოქვეყნებული დოკუმენტებიდან ჩანს, რომ ,,სოლნცევოს საძმო’’ თავის საქმიანობას რუსეთის ფედერალური უსაფრთხოების სამსახურის (ფსბ) მფარველობის ქვეშ ახორციელებს. ზოგადად რუსული მაფია დეცენტრალიზებულია და შედგება 10 კვაზი ავტონომიური ბრიგადებისგან, რომლებიც დამოუკიდებლად მოქმედებენ.
  1. იამაგუჩი გუმი (იაკუძა, იაპონია) – იაკუძას ერთერთი ჯგუფი და ყველაზე დიდი კრიმინალური დაჯგუფება მსოფლიოში. პირველ ადგილზეა ნარკოტიკებით ვაჭრობისგან მიღებული შემოსავლებითაც. მისი წლიური შემოსავლები 6.6 მილიარდ დოლარს აჭარბებს. განსხვავებით რუსული მაფიისგან, იაკუძას დაჯგუფებები უაღრესად ცენტრალიზებულია, იერარქიულია და ძირითადად ოჯახურ-ნათესაურ ურთიერთობებზე დაყრდნობული კონგლომერატია. ბოლო წლებში იაპონიის მთავრობის მიერ იაკუძას წინააღმდეგ წარმოებული პოლიტიკით თუ სხვა ჯგუფები დასუსტდნენ, იამაგუჩი გუმი პირიქით გაძლიერდა და საკუთარი შემოსავლიანი საქმიანობა კიდევ უფრო გაზარდა.

23804572_10213137228898494_208293146_n

  1. კამორა (კოზა ნოსტრა, იტალია) – მაშინ როცა აშშ-ში იტალიურ-ამერიკული მაფია ბოლო ათწლეულებში მნიშვნელოვნად დასუსტდა, იტალიაში მათ ფეხი კვლავ მტკიცედ აქვთ გადგმული საზოგადოებაში, ბიზნესსა და პოლიტიკაში. განსაკუთრებით ეს ადგილობრივი თვითმმართველობის ორგანოებზე უნდა ითქვას, რომელთა უმეტესობასაც კოზა ნოსტრასთან მჭიდრო ურთიერთობები აკავშირებთ. ამჟამად კოზა ნოსტრას ჯგუფებიდან ყველაზე ძლიერი არის კამორა, რომელიც ჯერ კიდევ XIX საუკუნეში დაარსდა და მოქმედების არეალად იტალიის კამპანიის რეგიონი და განსაკუთრებით კი მისი ცენტრი ნეაპოლი აქვს არჩეული. მისი წლიური შემოსავალი დაახლოებით 4.9 მილიარდ დოლარს შეადგენს, რომელიც ძირითადად მოდის ნარკოტიკებით ვაჭრობაზე, სექსუალურ ექსპლოატაციაზე, აზარტულ თამაშებზე, იარაღით ვაჭრობაზე და ა.შ.

23845499_10213137228138475_529008260_n

 

  1. ნდრაგენტა (კოზა ნოსტრა, იტალია) – იტალიური მაფიის კიდევ ერთი წარმომადგენელი, რომელიც კალაბრიის რეგიონშია ბაზირებული. იგი კოზა ნოსტრას სხვა დაჯგუფებებისგან განსხვავებით ძირითადად ორიენტირებულია ტრანსატლანტიკურ ნარკო ტრეფიკზე და მჭიდრო ურთიერთობები აქვს დამყარებული სამხრეთ ამერიკულ ნარკო კარტელებთან, რომელთა მიერ წარმოებული კოკაინიც ევროპულ ბაზარზე შემოაქვს.

 

23845388_10213137229098499_1192884500_n

 

  1. სინალოას კარტელი (მექსიკა) – მექსიკის ყველაზე დიდი ნარკოკარტელი. სამხრეთ ამერიკაში წარმოებული კოკაინის მთავარი დისტიბუტორი ამერიკულ ბაზარზე. თეთრი სახლის მონაცემებით ყოველწლიურად ამერიკელები დაახლოებით 100 მილიარდ დოლარს ხარჯავენ ნარკოტიკებზე. აქედან 6.5 მილიარდი დოლარი მიდის მექსიკური კარტელების ჯიბეში. კონკრეტულად სინალოას კარტელის წლიური შემოსავალი დაახლოებით 3 მილიარდ დოლარს შეადგენს.

23782205_10213137228298479_876654471_n

 

 

 

 

სოჭში ერთმანეთს რუსეთის ფედერაციის პრეზიდენტი ვლადიმერ პუტინი და სირიის პრეზიდენტი ბაშარ ალ-ასადი შეხვდნენ. კრემლის საიტის ინფორმაციით, ასადი სოჭში სამუშაო ვიზიტით ჩავიდა.

ვლადიმერ პუტინმა სირიის ლიდერი თავდაცვის სამინისტროს ხელმძღვანელობასა და რუსეთის ფედერაციის შეიარაღებული ძალების გენერალურ შტაბს წარუდგინა.

რუსეთის ლიდერმა კოლეგას ტერორიზმთან ბრძოლაში მიღწეული წარმატებები მიულოცა – აღნიშნულია კრემლის საიტზე.

გერმანიაში კანცლერ ანგელა მერკელის ერა შესაძლოაახლო მომავალში დასრულდეს. საქმე იმაშია, რომ გერმანიის თავისუფალმა დემოკრატიულმა პარტიამ 4 კვირიანი მოლაპარაკებების შემდეგ უარი თქვა მერკელის ქრისტიან-დემოკრატიულ კავშირთან და მწვანეებთან ერთად კოალიციური მთავრობის ჩამოყალიბებაზე. შედეგად შეიქმნა პოლიტიკური კრიზისი, რომლიდანაც ერთადერთი გამოსავალი ახალი არჩევნების ჩატარებაა. არჩევნების დანიშვნა გერმანიის პრეზიდენტის კომპეტენციაა და ამ საკითხზე კანცლერმა მერკელმა უკვე გამართა კონსულტაციები ფრანკ-ვალტერ შტაინმაიერთან.

მეორე მსოფლიო ომის შემდეგ გერმანიას მსგავსი ტიპის პოლიტიკური კრიზისი არ ახსოვს. სექტემბრის არჩევნებში მიღებული ცუდი შედეგების შემდეგ კოალიციის ვერშექმნა მერკელის ავტორიტეტისათვის სერიოზული დარტყმა იქნება და დიდი შანსია მომავალ არჩევნებში პარტიამ მის ნაცვლად ახალი ლიდერის ძებნა დაიწყოს. გამომდინარე შექმნილი მძიმე ვითარებიდან, ანგელა მერკელი გასულ კვირას შვედეთში ჩატარებულ ევროკავშირის ლიდერების სამიტს არ დაესწრო და განაცხადა, რომ რაღაც დროით იგი ქვეყნის შიგნით მიმდინარე საქმეებით იქნება დაკავებული. ლიდერი, რომელიც წლების მანძილზე გერმანელი ხალხისთვის სტაბილურობის გარანტი იყო, დღეს უკვე კრიზისის სიმბოლო გახდა და პოლიტიკური გადარჩენისთვის იბრძვის.

კალიფორნიაში, ბეკერსფილდის ჰოსპიტალში 83 წლის ასაკში გარდაიცვალა ჩარლზ მენსონი, ე.წ. მკვლელების კულტის სულიერი ლიდერი. 1960-იან წლებში მენსონმა გარშემო შემოიკრიბა ახალგაზრდა თანამოაზრეები, დაარწმუნა ისინი, რომ იგი იყო იესო ქრისტეს რეინკარნაცია და უბიძგა მათ მასობრივი მკვლელობების ჩადენისკენ. მას სჯეროდა, რომ აშშ-ში რასობრივი ომი იყო კარზე მომდგარი და ფიქრობდა, რომ მკვლელობებში ხალხი შავკანიან მოსახლეობას დაადანაშაულებდა და ამით რასობრივ დაძაბულობას გამოიწვევდა.

შედეგად მისმა მიმდევრებმა, რომლებიც შემდეგ ,,მენსონის ოჯახის’’ სახელით გახდნენ ცნობილნი, 1969 წელს 9 ადამიანის მკვლელობა ჩაიდინეს. მსხვერპლთა შორის იყო რეჟისორ რომან პოლანსკის ფეხმძიმე მეუღლე შარონ ტატე, რომელსაც ჯერ დანით მრავლობითი ჭრილობა მიაყენეს, შემდეგ კი მისი სახლის კარებზე მისივე სისხლით სიტყვა ,,ღორი’’ დაწერეს. მკვლელებმა ტატეს სახლში მყოფი კიდევ 4 ადამიანი დანებით აჩეხეს. შემდეგ დღეს მათ კიდევ ერთი ცნობილი და შეძლებული ლოს-ანჯელესის მკვიდრი ცოლ-ქმარი ლენო და როზმარი ლებიანკები გამოასალმეს სიცოცხლეს.

მიუხედავად იმისა, რომ მენსონი თვითონ არ მონაწილეობდა ადამიანების მკვლელობებში, იგი სასამართლომ დამნაშავედ ცნო და სიკვდილით დასჯა მიუსაჯა. თუმცა იმ პერიოდში კალიფორნიაში სიკვდილით დასჯა გაუქმდა და მას სასჯელი 9-გზის სამუდამო პატიმრობით შეეცვალა. პატიმრობისას მან 12-ჯერ მიმართა შეწყალებისთვის შესაბამის ორგანოებს, მაგრამ ყველა თხოვნაზე უარი მიიღო.

იტალიის ქალაქ პარმაში პატიმრობაში მყოფი იტალიური კოზა ნოსტრას ერთ დროს დაუნდობელი და სასტიკი ,,ბოსთა ბოსი’’ სალვატორე ,,ტოტო’’ რიინა 87 წლის ასაკში გარდაიცვალა. რიინას 26 გზის სამუდამო პატიმრობა ჰქონდა მისჯილი 150 ადამიანის მკვლელობის ბრძანების გაცემის გამო. იგი ბოლო წლებში თირკმლის სიმსივნით, პარკინსონით და გულთან დაკავშირებული დაავადებებით იტანჯებოდა და საბოლოოდ კომაში მყოფი გარდაიცვალა.

სალვატორე რიინა 1930 წელს სიცილიაში, ქალაქ კორლეონეში დაიბადა. 19 წლის ასაკში ადგილობრივ მაფიაში გაწევრიანდა და პირველი მკვლელობაც ჩაიდინა. 70-იან წლებში იტალიური კოზა ნოსტრას ბოსი გახდა და სისასტიკისთვის მეტსახელად ,,მხეციც’’ კი შეარქვეს.80-იანი წლების ბოლოს და 90-იანების დასაწყისში რიინა იტალიის სახელმწიფოს წინააღმდეგ დაუნდობელ ომს აწარმოებდა, რომელსაც ასეულობით სამართალდამცველი და სასამართლო ორგანოების წარმომადგენელი შეეწირა. 1992 წელს მისი ბრძანებით მაფიის წინააღმდეგ მებრძოლი ორი მოსამართლე ჯოვანი ფალკონე და პაოლო ბორსელინო მოკლეს, რამაც იტალიელი ხალხის მოთმინების ფიალა აავსო. 1993 წელს საბოლოოდ მოხერხდა რიინას ადგილსამყოფელის დადგენა და დაპატიმრება.

ციხეში მყოფი რიინა მაინც ახერხებდა თავისი ,,საქმიანობის’’ შესრულებას. ციხიდან მისი გაცემული ბრძანებით გაიტაცეს 13 წლის ბავშვი მამამისზე ზეწოლის მოსახდენად და სასამართლოში ჩვენების არმისაცემად. საბოლოოდ ბავშვი მოკლეს და მისი სხეული დაანაწევრეს. აღსანიშნავია, რომ სალვატორეს უფროსი ვაჟიც სამუდამო პატიმრობას იხდის 4 მკვლელობაში მონაწილეობის გამო.

გუშინ, 13 ნოემბერს სოჭში თურქეთისა და რუსეთის პრეზიდენტების შეხვედრისას განხილვის ძირითადი საკითხი სირიაში მიმდინარე მოვლენები და ქვეყნის მომავალი განვითარების პერსპექტივების განხილვა იყო. მიუხედავად იმისა, რომ ისინი სირიის კონფლიქტის მიმდინარეობისას ურთიერთდაპირისპირებულ ბანაკებს უჭერდნენ მხარს, დღეისათვის მათი პოზიციები ამ ქვეყნის პოლიტიკურ მომავალზე ერთმანეთს ემთხვევა. ,,ტერორიზმის წინააღმდეგ მიღწეული წარმატებებიდან გამომდინარე, მე და თურქეთის პრეზიდენტი შევთანხმდით, რომ ძალები არ უნდა დავიშუროთ სირიაში სიტუაციის გრძელვადიანი ნორმალიზაციისათვის’’ – განაცხადა ვლადიმერ პუტინმა.

თავის მხრივ რეჯეფ ტაიპ ერდოღანი მიესალმა ვიეტნამში პრეზიდენტ ტრამპისა და პუტინის მიღწეულ შეთანხმებას სირიაში დეესკალაციის ზონებთან დაკავშირებით. ,,მოხარული ვარ, რომ ურთიერთობამ რუსეთსა და თურქეთს შორის ახალ, უფრო ძლიერ დონეს მიაღწია. განსაკუთრებით უნდა აღინიშნოს ჩვენს ქვეყნებს შორის თავდაცვის მრეწველობის კუთხით თანამშრომლობაში გადადგმული ნაბიჯები’’ – განაცხადა მან. შეგახსენებთ, რომ ცოტა ხნის წინ თურქეთმა გააფორმა ხელშეკრულება რუსეთისგან  s-400 ტიპის სარაკეტო კომპლექსის შეძენასთან დაკავშირებით.

ავიაკომპანია KLM-ის Boeing 777-300-ს, რომელიც  ამსტერდამი-ლიმას რეისს ასრულებდა,ფრენის დროს მეხი დაეცა. ინციდენტი ამსერტდამის სკიპჰოლის აეროპორტში მოხდა.

ინციდენტის შედეგად არავინ დაშავებულა.

 

როგორც ჩანს, დონალდ ტრამპის აზიური ვიზიტები მხოლოდ ჩრდილოეთ კორეის წინააღმდეგ მოკავშირეების მოძიებასა და მხარდაჭერის მოპოვებაზე არ იყო მიმართული. აშშ-ს პრეზიდენტის აზიური ტურნეს დასრულების პარალელურად, შტატების სამხედრო საზღვაო ძალები თავის იაპონელ და სამხრეთ კორეელ კოლეგებთან ერთად უპრეცედენტო მასშტაბის საზღვაო წვრთნებს ატარებენ, ჩრდილოეთ კორეის მახლობლად საერთაშორისო წყლებში. წვრთნებში სხვა ამერიკულ ხომალდებთან ერთად სამი ავიამზიდი ,,რონალდ რეიგანი’’, ,,თეოდორ რუზველტი’’ და ,,ნიმიცი’’ მონაწილეობენ. იაპონიის მხრიდან ძირითადად ჩართული არიან გამანადგურებლის (ესმინეცი) ტიპის ხომალდები, ხოლო სამხრეთ კორეის მხრიდან კი 7 საბრძოლო ხომალდი. საზღვაო წვრთნები შაბათს დაიწყო და მისი დასრულება სამშაბათისთვის იგეგმება.

 

სირიის პრეზიდენტმა ბაშარ ალ-ასადმა მადლობის წერილი გაუგზავნა აფხაზეთის თვითაღიარებული რესპუბლიკის დე-ფაქტო პრეზიდენტს რაულ ხაჯიმბას. წერილში იგი მადლობას უხდის ხაჯიმბას მისთვის დაბადების დღის მილოცვისთვის და სირიელი ხალხის მიმართ გამოთქმული თბილი სიტყვებისთვის.

,,წავიკითხე რა თქვენი გზავნილი, მივხვდი, რომ კარგად ერკვევით ჩემს ქვეყანაში შექმნილ ვითარებასთან დაკავშირებით. განსაკუთრებით იმ საკითხში, რაც შეეხება იმ სასტიკ თავდასხმებს და განადგურების პოლიტიკას, რასაც ზოგიერთი ქვეყანა იყენებს თავისუფალი ერების წინააღმდეგ, ნაცვლად ერთა შორის ცივილიზებული დიალოგისა და თანამშრომლობისა.

ჩვენ ძალიან ვაფასებთ თქვენს პოზიციას ჩვენი არმიის და ჩვენი მოკავშირეების მიერ მიღწეული წარმატებების მიმართ ტერორიზმის წინააღმდეგ ბრძოლაში. გამოვთქვამ მადლობას თქვენი მხარდაჭერისთვის ჩემს ქვეყანაში შექმნილ კრიზისთან დაკავშირებით“ – ნათქვამია წერილში.

7,3 მაგნიტუდის მიწისძვრას ერაყსა და ირანში 328 ადამიანი ემსხვერპლა. დაშავებულთა რიცხვი 2500-ს აღემატება. მონაცემებს ტელეკომპანია „ალ-ჯაზირა“ ავრცელებს. საავადმყოფოში მყოფი 380 დაშავებულის მდგომარეობა მძიმეა.

აშშ-ის გეოლოგიური სამსახურის ინფორმაციით, 7,3 მაგნიტუდის მიწისძვრა ადგილობრივი დროით, საღამოს 09:18 წუთზე მოხდა. ეპიცენტრი ერაყის ქურთისტანის რეგიონის ტერიტორიაზე მდებარე ქალაქ ჰალაბჯასთან მდებარეობდა.

ყველაზე მეტად სტიქიამ ირანის ქირმანშაჰის პროვინცია დააზარალა. ყველაზე მეტი ადამიანი ირანის ქალაქ სარპოლ-ზაჰაბში დაიღუპა.
მიწისქვეშა ბიძგები იგრძნობოდა ხმელთაშუა ზღვის სანაპიროზე, თურქეთში, ისრაელსა და ქუვეითში.