მთავარი საერთო ბაგრამის საავიაციო ბაზაზე გამოჩენილი მამაცობისთვის ქართველი სამხედროები და აშშ-ის საზღვაო ქვეითები დააჯილდოვეს

ბაგრამის საავიაციო ბაზაზე გამოჩენილი მამაცობისთვის ქართველი სამხედროები და აშშ-ის საზღვაო ქვეითები დააჯილდოვეს

43-ე ბატალიონმა „მტკიცე მხარდაჭერის“ მისიის ოთხი თვე შეაჯამა

ბაგრამის საავიაციო ბაზაზე დისლოცირებულმა IV მექანიზირებული ბრიგადის 43-ე ბატალიონმა „მტკიცე მხარდაჭერის” მისიის პირველი ოთხი თვე შეაჯამა. ამ მიზნით, 43-ე ბატალიონის მეთაურმა, ვიცე-პოლკოვნიკმა ვიტალი ცხადაძემ ამერიკელ საზღვაო ქვეითებთან ერთად ბრიფინგი გამართა. ბრიფინგს საქართველოს უფროსი სამხედრო წარმომადგენლობის ოფისის წევრები და კოალიციური ძალების უცხოელი სამხედრო მოსამსახურეებიც დაესწრნენ.

ღონისძიების დასასრულს 43-ე ბატალიონის ხელმძღვანელობამ გამორჩეული ქართველი სამხედრო მოსამსახურეები და აშშ-ის საზღვაო ქვეითები დააჯილდოვა. მასტერ-სერჟანტ დავით რატიანს, კაპრალებს – ზურაბ კიკაძეს, თემურ ქირიასა და კახა ჩხოლარიას უწყებრივი მედლები “სიცოცხლის გადარჩენისთვის” თავდაცვის მინისტრის ბრძანების საფუძველზე გადაეცათ.

სამხედროებმა ჯილდოები ივნისში ბაგრამის საავიაციო ბაზაზე განხორციელებული არაპირდაპირი ცეცხლის დროს გამოჩენილი მამაცობისა და კოალიციური ძალების ორი სამოქალაქო პირისთვის პირველადი სამედიცინო დახმარების აღმოჩენისთვის დაიმსახურეს. 43-ე ბატალიონის სხვა სამხედროებმა კი მედლები „სამშობლოსათვის თავდადებული“ და „საბრძოლო იარისთვის” მიიღეს.

“მტკიცე მხარდაჭერის” მისიაში დაკისრებული ფუნქცია-მოვალეობების პირნათლად და მაღალხარისხიანად შესრულებისთვის 130 ქართველ სამხედრო მოსამსახურესა და აშშ-ის საზღვაო ქვეითთა კორპუსის ქართული სამეკავშირეო ჯგუფის 7 საზღვაო ქვეითს მადლობის სიგელები გადაეცათ.

ნატოს ეგიდით მიმდინარე “მტკიცე მხარდაჭერის” მისიაში 43-ე ბატალიონის პირადი შემადგენლობა აშშ-ის საზღვაო ქვეითებთან ერთად მარტიდან მსახურობს. 43-ე ბატალიონთან ერთად სამშვიდობო მისიაში პირველად მონაწილეობს ეროვნული გვარდიის გაძლიერებული ოცეული. ქართველი სამხედროები 6 თვის განმავლობაში, „მტკიცე მხარდაჭერის“ მისიის ფარგლებში სრული სპექტრის ოპერაციებს ახორციელებენ. მათი მთავარი ამოცანა ბაგრამის საავიაციო ბაზის უსაფრთხოების უზრუნველყოფაა. ქართველმა ჯარისკაცებმა მომზადება შეერთებული შტატების საზღვაო ქვეითების სასწავლო და საკონსულტაციო ჯგუფის ხელმძღვანელობით გაიარეს.

კომენტარი არ არის

დატოვეთ კომენტარი